TYNESARHÚSIÐ Á SIGLUFIRÐI


Húsið er talið byggt um 1906 fyrir Sigfús Guðlaugsson við Aðalgötu á Siglufirði. Það var upphaflega einlyft, á allháum kjallara, portbyggt með kvisti og inngangi á miðri götuhlið. Það var klætt láréttum panel, vatnspanel að utan og vatnsbretti eða bekkur allan hringinn ofan við glugga. Húsið var stækkað og því breytt nokkrum sinnum. Um 1925 hefur neðri hæð hússins verið stækkuð til vesturs og inngangur verið færður þangað og er frá Norðurgötu. Húsið var þá járnklætt. Um tíu árum seinna hefur verið byggt ofan á viðbygginguna og kvisturinn að götunni jafnframt stækkaður og þar eru tveir 3ja faga gluggar.
Árin 1998-99 var húsið endurgert, klætt utan nýrri vatnsklæðningu sem gerð var eftir gömlu klæðningunni. Nýir gluggar voru smíðaðir eftir þeim sem fyrir voru og nokkrar breytingar gerðar á gluggasetningu til samræmingar. Tröppur utanhúss voru endurgerðar og húsið fært aftur í upphaflegan sveitser-búning sinn.