Argos ehf Arkitektastofa Grétars og Stefáns

Arkitektastofa Grétars og Stefáns

Eins og glöggir lesendur sjá er ARGOS stytting fyrir Arkitektastofu Grétars og Stefáns, sem er heiti á vinnustofu arkitektanna Grétars Markússonar og Stefáns Arnars Stefánssonar. Samstarfið má rekja til ársins 1980 er þeir unnu báðir á Teiknistofu Stefáns Jónssonar en enn áður höfðu báðir unnið á Teiknistofunni Höfða í Reykjavík. Þeir stofnuðu saman Teiknistofuna Skólavörðustíg 28 sf. árið 1991 en flutningur stofunnar út í Örfirisey 2005 kallaði eiginlega á nafnbreytingu þó ekkert annað hafi svo sem breyst í starfi eða eða stefnu.

Nú erum við til húsa á Eyjarslóð 9, 2. hæð og unum okkur ágætlega innan um fjölbreytt lið fatahönnuða og fisksala, ljósmyndara og línuveiðara, seglagerða og sjóbúða.

Þó við séum ekki stærsta stofa landsins eru verkefnin okkar fjölbreytt og af mörgum toga eins og fram kemur að einhverju leyti á þessum vef. Við höfum raðað nokkrum verkefnum saman eftir eðli þeirra til kynningar. Þau hafa reyndar ekki öll verið framkvæmd, sum náðu ekki lengra en á hugmyndastigið en þau eru kannski ekki síður forvitnileg.

Helstu verkefni

Húsafriðun - Viðgerðir og endursmíði í upphaflega gerð
Ekki eru ýkja mörg ár síðan húsafriðun eða húsvernd, varðveisla byggingararfsins varð að meðvitaðri stefnu hér á Íslandi fyrst á vegum Þjóðminjasafns og byggðasafna og fáeinna einstaklinga en á áttunda áratugnum sem víðtækari hreyfing og almennur menningarþáttur.

Viðbyggingar og endurbætur á eldri húsum
Þessi flokkur verka og verkefna er nokkuð fyrirferðarmikill þó að þau séu mjög misjöfn innbyrðis að stærð, gerð og fyrirferð. Teiknaðar hafa verið viðbyggingar og breytingar og stækkanir á steinsteyptum húsum í Reykjavík frá öndverðri síðustu öld og torfbæja til sveita reyndar frá svipuðum tíma eldri hús hafa verið endurbyggð með breytingum til að halda gömlu yfirbragði en þjóna nýju hlutverki.

Nýbyggingar
Við höfum ekki eingöngu verið í fortíðinni, nýbyggingar eru einnig alltaf á verkefnalistanum og fjölbreytni er enn á ný eitt af einkennum þeirra.

Skipulagsverkefni
Fjölbreytni einkennir einnig skipulagsverkefnin, allt frá svæðisskipulagi fyrir Ölfus, Hveragerði og Selfoss, sem unnið var að á árunum 1995 – 2000 í framhaldi af eldri vinnu að sama verkefni. Aðalskipulag var unnið fyrir Hveragerði 1993- 20013, unnið var að aðalskipulagi fyrir Austur-Eyjafjallahrepp á árunum sem síðat varð hluti af aðalskipulagi Rangárþings eystra 2000 – í samstarfi við marga aðra. Deiliskipulag hefur verið unnið fyrir Grjótaþorpið í Reykjavík 2003, Túnahverfi á Álftanesi 2002, endurskoðað deiliskipulag iðnaðarsvæðis á Ártúnshöfða 1999 og gerðar tillögur að staðsetningu ÍR- hússins í á nokkrum stöðum í Reykjavík áður en það var endanlega flutt í Árbæjarsafn. Fyrir Minjavernd og Þyrpingu voru gerðar tillögur að skipulagi safnhúsa Árbæjarsafns á austurhluta Viðeyjar árið 2005.

Kirkjur - Viðgerðir og endurbætur - Sáluhlið
Kirkjur í Reykjavík og öllum landsfjórðungum hafa verið meðal verkefna okkar. Í Reykjavík höfum við komið að endurbótum á Fríkirkjunni í Reykjavík í tæpan áratug en upphaf hennar má rekja til stofnunar Fríkirkjusafnaðarins aldamótaárið 1900. Nokkur sáluhlið og klukknahlið hafa verið teiknuð oft eftir gömlum myndum en einnig eftir upphaflegum uppdráttum eins og við Hraungerðiskirkju í Flóa.

Tilgátuhús
Tilgátuhús er orð sem notað erum byggingar sem reistar eru eins og talið er að þau hafi verið, hafi getað verið, en nákvæmar upplýsingar eru af skornum skammti og jafnvel er byggt á samtíningi upplýsinga um svipaðar byggingar, byggingaaðferðir og hugmyndir, sem aðrir hafa sett fram.

Byggingarrannsóknir og mælingar
Byggingarrannsóknir fela yfirleitt í sér mælingar og teikningar. Í þeim felst skrásetning þess mannvirkis og stundum jafnvel umhverfis þess sem um ræðir. Frekari rannsóknir felast svo í því reyna að kortleggja byggingarsöguna, skræla lag fyrir lag af núverandi mynd til upphafsins.

ARGOS ehf

Arkitektastofa Grétars og Stefáns

Helstu verkefni